Градот на крадците: Неуморната банда поради која жителите во овој град живеат во „кафези“

Околу 4.500 мајмуни владеат на улиците на тајландскиот град Лопбури и нивниот број со години не се намалува.

Тоа е голема атракција за туристите, но не и за локалните жители поради тоа што за нив тоа е вистинска главоболка.

Некои од граѓаните живеат во жичани „кафези“, огради кои што морале да ги постават околу своите домови за мајмуните да не им ја крадат храната, да им ги земаат работите и да ги малтретираат.

Уличните продавници секако мора да внимаваат за мајмуните да не им ја украдат робата од „пред нос“. За да ги избркаат, луѓето се служат со прачки кои што секогаш ги имаат при рака.

Освен овошје и зеленчук, мајмуните знаат како да позајмат и очила за сонце од главите на минувачите.

Граѓаните кои што се емпатични во врска со мајмуните признаваат дека не е лесно тие да бидат во Лопбури поради тоа што животните таму немаат питки извори за вода ниту пак доволно дрвја за да се искачуваат на нив.

Поради тоа тие им помагаат колку што можат. Во текот на пандемијата на коронавирусот ситуацијата се влошила, па градските власти инсистирале да се зголеми стерилизацијата на мајмуните.