Доналд Трамп стави потпис: Заврши рекордната 43-дневна блокада на САД

Доналд Трамп стави потпис: Заврши рекордната 43-дневна блокада на американската влада

Американскиот претседател Доналд Трамп го потпиша законот за привремено финансирање на владата, ставајќи крај на рекордната 43-дневна блокада што ги наруши јавните услуги и остави стотици илјади федерални вработени без плата. Потписот, кој се сметаше за формалност откако законот помина во двата дома на Конгресот, донесе привремено олеснување во Вашингтон, иако вистинската битка е само одложена.

Блокадата започна на 1 октомври, бидејќи републиканците и опозициските демократи не можеа да се договорат за новиот федерален буџет. Без одобрен план за трошење, владините агенции останаа без пари, што доведе до прекин на платите за федералните работници, војската и социјалните програми. Жестоката расправија траеше со недели, а во нејзиниот центар беше прашањето за трошоците за здравствена заштита.

Како се ‘отклучи’ Вашингтон?

За да помине законот во Сенатот, на републиканците (кои имаат 53 сенатори) им беа потребни најмалку 60 гласа, што значеше дека мораа да добијат поддршка од неколку демократи. Демократите со недели одбиваа да поддржат компромис, користејќи ја блокадата како алатка за притисок во преговорите за здравството. Меѓутоа, во текот на викендот, неколку умерени демократи го сменија својот став, отворајќи го патот за законот да помине во Сенатот во понеделникот, а потоа и во Претставничкиот дом.

Она што го потпиша Трамп не е трајно решение, туку преоден буџет. Тој го финансира нормалното работење на владата само до крајот на јануари. Доколку дотогаш не се постигне конечен договор за буџетот, на САД им се заканува уште една, идентична блокада во февруари.

Трамп: ‘Ова е одличен ден’

И покрај тоа што се работи за привремена мерка, претседателот Трамп го прослави потпишувањето. „Со мојот потпис, Федералната влада сега ќе продолжи со нормалното работење… ќе продолжиме со нашата работа за намалување на трошоците за живот, враќање на јавната безбедност, раст на нашата економија и Америка повторно да ја направи прифатлива“, изјави Трамп, пред да додаде: „Ова е одличен ден“.

Критичарите, сепак, забележуваат дека 43-дневната блокада предизвика огромна штета на економијата и дека вистинскиот проблем – длабокото несогласување околу буџетските приоритети – воопшто не е решен, туку само е одложен за неколку месеци.