ЕУ СЕ ЗАТВОРА: 12 земји, вклучително и Германија и Хрватска, НЕ МОРА да примаат нови мигранти до 2026!

Дванаесет земји-членки на ЕУ, меѓу кои и Хрватска, Германија, Франција и Полска, ќе можат да побараат да не примаат дополнителни мигранти до крајот на 2026 година, според новиот „механизам за солидарност“ на ЕУ.

Ова произлегува од анализата на комесарот за внатрешни работи на ЕУ, Магнус Брунер, како дел од реформата на политиката за азил (ГЕАС). Причината за ова изземање е што овие земји веќе се грижат за голем број баратели на азил за кои, според правилата, други земји-членки би требало да бидат одговорни.

Италија, Грција, Шпанија и Кипар ќе добијат помош

Анализата на Европската комисија ги посочува Грција, Кипар, Шпанија и Италија како држави кои се под висок миграциски притисок и ќе имаат право да добијат солидарност од другите членки. Оние земји кои ќе го искористат правото да не примаат мигранти (како Германија) ќе можат да ја покажат својата солидарност преку плаќања во готово или материјални придонеси, како на пример опрема за чување на границите (ЕК веќе издвои 250 милиони евра за дронови).

Повеќе од само пари – построгите политики дале резултат

Комесарот Брунер истакна дека Германија веќе понела голем дел од товарот и ќе има корист од реформата. Целта на новиот пакт е мигрантите да останат во земјата во која првпат пристигнуваат (пр. Грција), додека тие земји за возврат ќе добијат помош од останатите. Брунер нагласи дека построгата политика за азил веќе покажува резултати, при што нелегалната миграција е намалена за 35 проценти во изминатата година.