Крај на пеколот на границите: Тошковски и Кочиу ветија дека летово ќе одиме во Албанија без чекање

Летните одмори во Албанија годинава нема да започнуваат со нервози и колони, бидејќи Македонија и Албанија конечно го финализираат системот „One Stop“ кој треба да профункционира пред почетокот на сезоната.

Ова е главниот заклучок од средбата во Скопје меѓу министерот за внатрешни работи Панче Тошковски и неговата албанска колешка Албана Кочиу. По неуспешните обиди во минатото, овој пат властите тврдат дека „трета среќа“ ќе биде реалност и дека оперативните тимови работат деноноќно за да се отстранат бариерите.

Олеснување на Ќафасан и Блато

Новиот режим на работа ќе се применува на двата клучни премини – Ќафасан (Коридор 8) и Блато (Дебар-Пешкопеја). Тошковски најави дека моделот ќе биде идентичен со оној што веќе успешно функционира на границата со Србија (Табановце).

„Оценувам дека пред почетокот на летната сезона ќе успееме да го спроведеме. Минатата година низ овие премини поминале 5 милиони граѓани и 1,8 милиони возила, што јасно покажува колку е итна оваа мерка“, изјави Тошковски.

Ново работно време за Џепиште-Требиште

Покрај главните премини, постигнат е и принципиелен договор за малиот граничен премин Џепиште-Требиште. Наместо ограниченото работно време, тој наскоро треба да функционира 24/7, што е огромно олеснување за локалното население.

Сепак, сенка на оптимизмот фрла искуството од летото 2023 година, кога тогашните премиери Ковачевски и Рама промовираа сличен концепт кој во пракса не ги намали колоните. Овој пат, министрите уверуваат дека бирократијата ќе биде целосно елиминирана преку заеднички центри за полициска и царинска соработка.