Крвните садови ги сакаат овие намирници: Нова анализа ги издвојува чајот, зрнестото овошје и какаото

Флавоноидите и нивното влијание врз крвните садови

Флавоноидите се голема група растителни соединенија кои природно се наоѓаат во чајот, какаото, зрнестото и цитрусното овошје, јаболката, кромидот, мешунките и зелениот зеленчук. Новата мета-анализа, објавена во престижниот научен часопис „Food & Function“, опфатила 11 рандомизирани контролирани студии со вкупно 561 учесник. Резултатите укажуваат дека намирниците богати со овие соединенија можат поволно да влијаат на краткорочните показатели за функцијата на крвните садови.

Учесниците кои консумирале намирници богати со флавоноиди покажале подобри резултати на тестот за проширување на крвните садови при зголемен проток на крв. Иако е забележана позитивна промена која укажува на подобра еластичност, истражувањето не покажало значително влијание врз намалувањето на систолниот или дијастолниот крвен притисок.

Не се замена за медицинска терапија

Научниците предупредуваат дека резултатите не значат оти една чаша чај или чинија боровинки можат да спречат инфаркт или мозочен удар. Овие намирници не треба да се третираат како лек, ниту со нив смее самоиницијативно да се заменува веќе пропишаната медицинска терапија за висок крвен притисок или други кардиоваскуларни заболувања.

За да се внесат повеќе флавоноиди, најдобро е во текот на денот да се комбинираат различни растителни извори како свежи или замрзнати боровинки, малини, мешунки, лиснат зеленчук и помали количини темно чоколадо со висок процент на какао. Треба да се внимава при изборот на производите, бидејќи чоколадите и флашираните чаеви кои содржат премногу додаден шеќер ги поништуваат сите позитивни здравствени ефекти.

„Наједноставниот заклучок гласи: на крвните садови многу повеќе им користи секојдневната разновидна растителна исхрана богата со влакна, витамини и минерали, отколку консумирањето на еден скап производ или концентриран суплемент на база на флавоноиди.“