Од 1 март задолжителна двојна проверка за онлајн плаќања

Од 1 март 2026 година стапува во сила обврската за засилена автентикација при сите онлајн плаќања со платежни картички, соопшти Народната банка

Новата мерка предвидува дополнителна потврда на идентитетот при секоја интернет-трансакција, со цел зголемена заштита на средствата на граѓаните и компаниите. Наместо досегашната СМС-потврда, корисниците ќе добиваат известување преку официјалната мобилна апликација на својата банка.

Потврда преку апликација, ПИН или биометрија

Клиентите ќе треба да ја одобрат трансакцијата преку мобилната банкарска апликација, користејќи ПИН, отпечаток од прст или препознавање на лице. Без оваа дополнителна потврда, плаќањето нема да може да се реализира, дури и ако некој ги поседува податоците од картичката.

Усогласување со европските стандарди

Засилената автентикација произлегува од Законот за платежни услуги и платни системи и претставува дел од процесот на усогласување со правилата на Европската Унија. Со оваа промена се зајакнува довербата во дигиталните плаќања и се подигнува нивото на безбедност во електронската трговија.