Весна Љ.
Албанскиот премиер Еди Рама претставил стратешки документ од 39 страници наречен „BESA“, кој треба да ја постави основата за управувањето во четвртиот мандат на неговата влада.
-
Петок
699 ден
524.25 ден
Документот бил презентиран на состанок со пратеничката група и членовите на кабинетот. Во него се дефинираат проблемите во управувањето, целите, механизмите за спроведување и начинот на кој ќе се мери одговорноста.
Рама нагласува дека „BESA“ не е обична партиска програма, административен правилник или документ создаден само за политичка промоција. Неговата примена треба да се гледа преку тоа како институциите ги носат, објаснуваат, спроведуваат и коригираат своите одлуки.
Седум правила за посигурно управување
Документот издвојува седум способности што социјалистите, Владата и државната администрација треба да ги изградат во новиот мандат:
- Слушање – институциите да го разберат незадоволството пред тоа да прерасне во криза.
- Докази – секоја стратешка одлука да се темели на проверливи факти.
- Објаснување – информациите да не бидат само објавени, туку и разбирливи за јавноста.
- Грижа – квалитетот на услугите и одржувањето да бидат важни колку и новите инвестиции.
- Мерење – резултатите да се оценуваат според промените во животот на граѓаните, а не само според бројот на активности.
- Учење – институционалните грешки да се претворат во знаење и да не се повторуваат.
- Предвидување – ризиците да се препознаваат додека се предупредувачки сигнали, а не кога веќе станале криза.
Што значи „беса“?
Името на документот се повикува на еден од најпознатите поими во албанската традиција. „Беса“ означува дадена чест и збор што мора да се одржи, заедно со лојалност, доверба и преземање лична одговорност.
Во традиционалното значење, човекот што дал беса има морална обврска да го исполни ветувањето, дури и кога тоа бара лична жртва. Поимот историски се поврзува и со гостопримството и заштитата на луѓето што побарале засолниште.
Не е доволно документот само да биде усвоен
Според стратегијата, јавните консултации, проценките на влијанието и плановите за успешност веќе постојат, но мора да се поврзат во единствен систем на одговорност.
Секоја нова административна обврска треба да замени, спои или поедностави постоечка процедура. Вистинскиот тест нема да биде усвојувањето на документот, туку дали граѓаните ќе почувствуваат промена во начинот на кој работат институциите.
