Расте тензијата на Корејскиот Полуостров: Пјонгјанг тестираше ново оружје кое може прецизно да го погоди Сеул

Прецизност и зголемен дострел до 115 километри

Според информациите од севернокорејската државна новинска агенција KCNA, тестирањето, кое се одржало во вторникот, ја потврдило супериорноста на ракетите со зголемен дострел кои користат автономен систем за прецизно наведување. Ракетите имаат капацитет да погодат цели на оддалеченост од 100 километри при стандардна траекторија, и дури 115 километри во комбиниран режим.

„Постои неопходност од концентрирање на најсмртоносните и најразорните офанзивни сили долж јужната граница“, изјави Пак Џонг-чон, потпретседател на Централната воена комисија, кој лично го надгледуваше тестирањето на новото оружје.

Директна закана за Сеул

Развојот на овој артилериски систем ѝ овозможува на Северна Кореја значително да го модернизира својот тактички и конвенционален арсенал кој е континуирано насочен кон јужниот сосед.

Експертите предупредуваат дека ваквиот напредок не е за потценување. Лим Еул-чул, професор на Институтот за далекоисточни студии во Сеул, истакнува дека употребата на систем за прецизно наведување значи дека Пјонгјанг сега може да погоди клучни објекти во пошироката област на Сеул со маргина на грешка од само неколку метри.

Оваа демонстрација на сила, според аналитичарите, не претставува само воена предност, туку има за цел да влее страв и психолошки притисок врз Јужна Кореја. Јужнокорејското Министерство за одбрана сè уште се нема официјално огласено по повод овие тестирања.