Санторини го сече туристичкиот луксуз, магарињата веќе не носат секого

Санторини воведува построги правила за туризмот, а симболот на островот – магарињата – веќе нема да „служи“ за секого

На патеката од старото пристаниште до Фира, каде туристите со години се качуваат со магаре по стрмни камени скали, од сега важи јасна граница: јавање е дозволено само за лица до 100 килограми. Мерката доаѓа по сè погласни реакции за благосостојбата на животните и се повикува на правило дека магарињата не смеат да носат повеќе од околу 20% од сопствената телесна тежина.

Зошто токму сега, пријави за исцрпеност, повреди и тежок ритам во шпиц на сезона

Според информациите, со години се пријавувале случаи на рани, преоптоварување и проблеми со ‘рбетот, особено кога метежот е најголем. Рутата е долга околу 400 метри и има приближно 500–600 скали, а животните ја минуваат неколку пати дневно, често под силно сонце и во гужва. Затоа, новите насоки не се само бројка на вага, туку обид да се намали ризикот од дехидратација и хронични проблеми со зглобовите.

Повеќе правила, повеќе надзор, и обврска за вода, паузи и евиденција за секое животно

Покрај ограничувањето на тежината, се бара редовен пристап до вода, задолжителни паузи и време без товар. Најавен е и поорганизиран надзор, со обележување и водење евиденција за да се следат условите и здравствената состојба на секое магаре. Пораката е јасна: традицијата може да остане, но без да се плаќа со здравјето на животните.

Масовниот туризам го менува островот, а магарињата станаа дел од пошироката дебата

Магарињата биле клучни за Санторини и пред патишта и жичарници, носеле материјали и луѓе низ стрмниот терен. Денес, туристите имаат избор: пеш, со жичарница или со магаре. Но, со растот на посетите и крстарењата, притисокот станал огромен, па и локалните власти веќе воведуваат ограничувања за дневниот број на бродови. Новите правила за магарињата се уште еден сигнал дека островот бара нов баланс меѓу „разгледница“ туризам и реалниот живот на терен.