Собранието станува безбедносна зона: Забрана за протести и дронови околу парламентот!

Околината на Собранието на Република Македонија ќе биде прогласена за безбедносна зона, а со тоа ќе се воведат и строги ограничувања.

Ова го најави претседателот на Собранието, Африм Гаши, истакнувајќи дека се подготвува посебен закон со кој ќе се забранат јавни собири, протести, манифестации, па дури и летање со дронови во периметарот околу парламентот.

Што точно предвидува овој предлог-закон и какви реакции предизвикува во јавноста поради можното ограничување на уставно загарантираните права и слободи?

Строги ограничувања: Целосна забрана за протести, градежни активности и дронови

Предлог-законот предвидува сериозни ограничувања во периметарот околу Собранието. Тоа вклучува целосна забрана за одржување јавни собири, протести, манифестации и летање со дронови и други беспилотни летала над Собранието и безбедносната зона.

Покрај тоа, ќе се забранат и сите градежни активности и поставување на инсталациона или линиска инфраструктура во дефинираниот безбедносен простор.

Според член 8 од законот, ќе бидат забранети: градежни активности, поставување на линиска и инсталациона инфраструктура, јавни собири, протести и манифестации, како и летање со дронови и други беспилотни летала над Собранието и безбедносната зона.

Укинување на дозволи и раскинување на договори: Контроверзни точки во предлог-законот

Со законот се предвидува и укинување на сите претходно одобрени дозволи за градба во оваа зона. Исто така, ќе се раскинат постоечките договори за земјиште во просторот што ќе биде прогласен за безбедносна зона. Предлогот, покрај Африм Гаши, е потпишан и од пратениците Беким Коку, Блерим Беџети, Борислав Крмов, Весна Бендевска, Никола Мицевски и Оливер Спасовски. Надлежно работно тело за разгледување на законот е Комисијата за одбрана и безбедност.

Овој предлог доаѓа во период на зголемени политички тензии и зачестени протести, што веќе предизвикува реакции во јавноста и кај граѓанските организации. Многумина се загрижени поради можноста за ограничување на уставно загарантираните права и слободи, што го прави овој закон предмет на широка дебата и контроверзи.