Крај на чекањето на Табановце: Стартува системот „One Stop“ со Србија

На граничниот премин со Србија, „Табановце-Прешево“, денеска ќе биде пуштен во употреба новиот систем за заедничка контрола.

Станува збор за системот „One Stop“ за заедничка интегрирана гранична контрола. На официјалниот старт на новиот систем ќе присуствуваат министрите за внатрешни работи на Македонија и на Србија, Панче Тошковски и Ивица Дачиќ.

Едно застанување за побрз проток на патници и стока

Воведувањето на овој систем, како што изјави неодамна министерот Тошковски, ќе овозможи многу побрз проток на граѓани. Ова е од огромно значење, бидејќи „Табановце-Прешево“ моментално е најфреквентниот граничен премин во државава.

Новиот начин на контрола, каде полициските и царинските формалности на двете држави се извршуваат на едно место, треба значително да го олесни метежот на границите. Ова е особено важно во летниот период кога има зголемен број на патувања.

Планови и за другите гранични премини

Системот „One Stop“ веќе е успешно воспоставен на премините со Косово. Тој функционира на премините Блаце и Јажинце. Во тек се и разговори со Албанија за воведување на системот на два гранични премина.

Со Бугарија и Грција, кои се членки на ЕУ и на Шенген-зоната, нема да има ваков систем. Сепак, со нив ќе се работи на организациски подобрувања за побрз проток на патници и стока.