Драма во Медитеранот: Грчките служби спасија над 1.000 бегалци за 24 часа

Во координирана спасувачка операција денеска се спасени околу 230 бегалци кои пловеле во два мали чамци.

Операцијата се случила во водите јужно од островот Гавдос во Средоземното Море. Веста ја пренесоа грчките медиуми. Операцијата била покрената кога брод на Фронтекс на отворено море забележал два чамци кои биле преполни со луѓе.

Продолжение на спасувачките акции од вчера

Грчките медиуми потсетуваат дека и вчера биле спасени повеќе од 840 бегалци. Тие биле спасени во неколку координирани спасувачки операции во крајбрежните подрачја јужно од Крит и Гавдос. Најголемата спасувачка операција вчера се случила на 25 наутички милји југоисточно од Гавдос. Тогаш, дури 430 луѓе биле евакуирани од еден преполн и преоптоварен рибарски брод.

Истиот ден, Фронтекс, Европската агенција за гранична и крајбрежна стража, спасила уште 96 мигранти од два брода во близина на островот Крит. Сите мигранти биле префрлени на безбедно.

Нагло зголемен миграциски бран од Либија

Бројот на мигранти кои се обидуваат од Либија да преминат во Европа е нагло зголемен во последните месеци, наведува новинската агенција Ројтерс. Мигрантите во Европа доаѓаат главно од Блискиот Исток и од Северна Африка. Најмногу ги има од Судан, Египет и Бангладеш.

Грција минатиот месец најави распоредување на две фрегати. Тие ќе бидат распоредени во близина на либиските територијални води. Целта е сузбивање на миграцискиот бран. Грција, исто така, упати повик до Либија за подобра соработка со ЕУ.