„Тему“ влегува на пазарот за храна во Европа, целта се производители од Германија и Швајцарија

Кинеската платформа „Тему“, која веќе е присутна на светскиот и на европскиот пазар, сега подготвено влегува и на пазарот на храна.

Компанијата веќе им пристапува на трговски оператори за храна, но и на индивидуални потрошувачи во Германија, Швајцарија и Австрија. Така, тие сега се во можност преку оваа платформа да купуваат свежо месо, пијалаци, кондиторски производи и други намирници.

Нова стратегија: Европска храна за европски потрошувачи

Платформата, која досега се фокусираше на продажба на исклучително пристапни непрехранбени производи од Кина, сега има силна амбиција да стане и доставувач на храна. Новата стратегија е да продава производи од Европа за европските потрошувачи. Според медиумите, „Тему“ ги одредува продажните цени на производите, што би можело да значи пониски цени.

Први успеси во Германија, наскоро и во Швајцарија

Како што информираат медиумите од Германија, пред неколку месеци „Тему“ основаше германска дивизија. Тие динамично им пристапуваат на помалите производители на кондиторски производи. Еден германски производител на месни производи, „Вурстбарон“, веќе неколку месеци продава на платформата и вели дека е задоволен од резултатите.

„Тему“, исто така, планира да влезе и на пазарот за храна во Швајцарија. Портпаролот на компанијата потврди дека се во тек подготовки, иако сè уште не е одреден конкретен датум. Експертите веруваат дека е голема веројатноста „Тему“ многу скоро да понуди храна и во Швајцарија.

Влезот на „Тему“ на европскиот пазар за храна е потег со огромни импликации. Од една страна, ова е потенцијално одлична вест за потрошувачите. Зголемената конкуренција речиси секогаш води до пониски цени, подобри услуги и поголем избор, а агресивната ценовна политика на „Тему“ е веќе добро позната.

Ова ќе ги принуди и постоечките синџири на маркети да станат поконкурентни. Сепак, од друга страна, постои и огромна опасност. Бизнис моделот на „Тему“, кој се темели на екстремно ниски цени и на огромен притисок врз добавувачите, може целосно да ги уништи традиционалните локални маркети и да создаде монополска структура.

Ова може да доведе до пад на квалитетот и до нефер пазарни услови на долг рок. На крајот, може да се заклучи дека оваа инвазија на „Тему“ е меч со две острици. Таа може да донесе краткорочни придобивки за потрошувачите, но истовремено претставува и долгорочна закана за стабилноста на целиот европски малопродажен пазар. Од подготвеноста на европските регулаторни тела да обезбедат фер конкуренција ќе зависи дали ова ќе биде приказна за успех или за непријателско преземање.