„Мојата најдобра пријателка“: Лора Дерн се збогува од мајка си, легендарната Дајан Лад

Познатата американска актерка и режисерка Дајан Лад, мајка на оскаровката Лора Дерн, почина на 89 години, оставајќи зад себе повеќедецениска кариера исполнета со култни улоги и награди.

Веста ја потврди нејзината ќерка, актерката Лора Дерн, во емотивна објава на социјалните мрежи.

„Со длабока тага, но и бескрајна благодарност за нејзиниот прекрасен живот, морам да соопштам дека мојата мајка, мојата најдобра пријателка и нашата убава Дајан Лад, почина мирно, опкружена со љубов,“ напиша Лора Дерн.

Кариера подолга од шест децении

Дајан Лад беше една од најпочитуваните холивудски актерки. Позната по својата суптилна емотивност и шарм, таа остави длабока трага во американската филмска сцена.

Беше номинирана за Оскар за улогите во филмовите „Alice Doesn’t Live Here Anymore“ (1974), „Wild at Heart“ (1990) и „Rambling Rose“ (1991) – во последниот проект таа играше заедно со својата ќерка Лора.

Покрај актерската кариера, Лад беше и режисерка, писателка и активистка, која често зборуваше за жените во филмската индустрија и мајчинството. Лора Дерн, во објавата наведе дека Дајан „била светлина и инспирација за сите кои ја познавале“.