Шок во Украина: Војската го мобилизираше возачот на Анџелина Џоли на контролен пункт!

Посетата на Анџелина Џоли на Херсон, Украина, беше обележана со бизарен инцидент, откако еден член од нејзиниот тим – наводно нејзиниот возач – бил мобилизиран во украинската армија, пишува „Политико“.

Холивудската ѕвезда во вторникот го посети Херсон, град на самата линија на фронтот, како амбасадор на УНИЦЕФ. Ова е нејзина втора посета на Украина од почетокот на руската инвазија во 2022 година.

Висок украински функционер потврдил за „Политико“ дека член на придружбата на актерката имал „инцидент“ со воени регрути на контролен пункт. Истиот функционер открил и дека Џоли не ја известила украинската влада за нејзиното пристигнување и влегла во земјата пешки.

Повеќе од само инцидент – контрадикторни информации

Околу случајот настана дополнителна конфузија. Копнените сили на украинската армија првично објавиле детално соопштение во кое се наведува дека возачот на актерката бил мобилизиран, но таа објава подоцна била избришана. Тие потоа изјавиле дека не можат „ниту да потврдат, ниту да негираат“ и дека информациите во медиумите се „искривени“.

Сепак, регионалната канцеларија за регрутирање во Миколаев (Николаев) го потврдила инцидентот, наведувајќи дека возачот на Анџелина Џоли бил регрут и добил покана за воена обука. Засега не е познато дали морал веднаш да се јави на повикот. Тимот на актерката одбил да даде официјален коментар.