Херојот Ахмед од Сиднеј би можел да ја загуби раката: „Сè би повторил“

Ахмед ал Ахмед (44), Сириец со австралиско државјанство, херојски се спротивстави на напаѓачите на плажата Бонди, но сега се соочува со тешки здравствени последици.

Според неговиот адвокат Сем Иса, Ахмед има пет прострелни рани на левата рака и куршум заглавен во лопатката, поради што постои ризик да ја загуби раката. И покрај болките, тој порачал дека „не жали и повторно би го сторил истото“.

Ахмед, кој добил државјанство во 2022 година по бегството од војната во Сирија, го совладал напаѓачот и му ја одзел пушката, велејќи му на својот братучед пред чинот: „Ќе умрам. Те молам кажи му на моето семејство дека заминав да спасувам животи.“ Неговата храброст ја пофалија австралискиот премиер Албаниз, но и американскиот претседател Доналд Трамп, кој го нарече „многу храбра личност“.

Како знак на благодарност, преку кампања на GoFundMe се собрани над 570.000 долари за негово лекување, вклучувајќи донација од 100.000 долари од милијардерот Бил Акман. Адвокатот на Ахмед сега апелира до властите да им доделат државјанство и на неговите родители како награда за службата на нивниот син кон заедницата.