Кој го храни светот? Топ 10 земји кои го контролираат глобалниот извоз на храна!

Само 10 земји во светот учествуваат во речиси половина од вкупниот глобален извоз на храна, што покажува колку е всушност концентрирано и ранливо глобалното снабдување. Според податоците од Светската трговска организација (СТО), 30-те најголеми извозници држат повеќе од 80 проценти од глобалниот пазар за земјоделски производи, чија вредност се проценува на неверојатни 1,5 трилиони долари. Како што растат трошоците и геополитичките тензии, земјоделската трговија добива сè поголема стратешка важност во меѓународната политика.

Кои се 10-те најголеми глобални извозници?

Американскиот континент го претставува столбот на глобалниот систем за трговија со храна. САД, Бразил, Канада и Мексико заедно генерираат речиси 30 проценти од светскиот земјоделски извоз, покривајќи сè – од житарки и месо, па до маслодајни растенија. Интересно е што Кина, иако е најголем вкупен производител на храна во светот, се наоѓа пониско на извозната листа бидејќи најголемиот дел од храната го троши за задоволување на огромниот домашен пазар.

Според официјалните извештаи на СТО, ова се десетте земји кои го хранат светот:

1. САД –  Доминација во житарки, соја и преработена храна
2. Бразил – Најголем глобален извозник на говедско месо и соја
3. Кина-  Огромен капацитет, но со висок домашен конзум
4. Канада – Клучен извозник на пченица и маслодајна репка
5. Мексико- Силно присуство во градинарство и прехранбена индустрија
6. Индонезија – Апсолутен лидер во извоз на палмино масло
7. Австралија – Главен снабдувач на месо и јачмен за азискиот пазар
8. Индија- Масовно производство на ориз и зачини
9. Тајланд- Извоз на ориз, морски плодови и тропско овошје
10. Франција –  Европски лидер во житарки, млечни производи и вино

Азиски пазари и европската технолошка ефикасност

Додека Америка доминира со огромни обработливи површини, земјите од Азија и Пацификот играат тесно специјализирана улога. Австралија е витален снабдувач на јачмен, пченица и говедско месо за Азија, додека Индонезија ја контролира прехранбената индустрија преку извозот на палмино масло. На другата страна е Европа, каде што Холандија (позиционирана на 11-то место) и покрај малата територија прави чуда во извозот благодарение на развиеното производство во оранжерии, високата технологија и ефикасната логистика. Франција и Германија исто така држат високи позиции со производи со висока додадена вредност.

Раст на цените и стратешката сигурност

Прекините во глобалниот транспорт и високите цени на енергенсите во изминатите години извршија огромен притисок врз пазарот. Со оглед на тоа што модерното земјоделство зависи од горива, вештачки ѓубрива и брза дистрибуција, секоја геополитичка криза веднаш ги покачува цените на основните продукти. Токму затоа, големите производители како САД, Бразил и Канада добиваат уште поголема моќ, бидејќи нивната развиена инфраструктура гарантира стабилност дури и во периоди на светски економски хаос.