Зеленски за првпат во Белград: три клучни теми со Вучиќ

Украинскиот претседател Володимир Зеленски престојува во Белград, каде денеска ќе се сретне со српскиот претседател Александар Вучиќ.

Двајцата лидери разговарале во повеќе наврати во изминатите години, но ова е прва официјална посета на украински претседател на Србија по неколку години.

Зеленски пристигна во Белград

Зеленски вчера околу 18 часот пристигнал на белградскиот аеродром „Никола Тесла“, каде го пречекала министерката за рударство и енергетика Дубравка Ѓедовиќ Хандановиќ.

По пристигнувањето порача дека Украина е „секогаш подготвена за конструктивна соработка“.

Три клучни теми на разговорите

Украинскиот претседател најави разговори со Вучиќ и со српскиот премиер Ѓуро Мацут.

„Ќе разговараме за проширување на економските врски меѓу нашите земји, односите со Европската Унија, други области кои можат да им користат на нашите народи и за безбедносни прашања“, изјави Зеленски.

Вучиќ претходно посочи дека меѓу главните теми ќе бидат европскиот пат на Србија и Украина, билатералната економска соработка и енергетиката.

I arrived in Serbia with my team. Important talks are scheduled for today and tomorrow – with President Aleksandar Vučić and Prime Minister Đuro Macut. We will discuss expanding economic ties between our countries, relations with the European Union, other areas that can benefit… pic.twitter.com/97FE3H3RBx

— Volodymyr Zelenskyy / Володимир Зеленський (@ZelenskyyUa) August 7, 2026

Свечен пречек и средба на делегациите

Свечениот пречек пред Палатата „Србија“ е предвиден за 10:30 часот, по што ќе следува разговор меѓу Вучиќ и Зеленски.

Потоа е планиран и состанок на делегациите на двете земји.

Ќе биде потпишан и меморандум

Во 12 часот е предвидено потпишување меморандум за соработка во областа на здравјето на животните и безбедноста на храната.

По потпишувањето, двајцата претседатели треба да дадат изјави за медиумите.

Србија не ја менува политиката кон Русија

Вучиќ нагласи дека посетата на Зеленски нема да значи промена на досегашната политика на Србија во однос на санкциите кон Русија.

„Србија ја утврди својата политика пред четири и пол, речиси пет години, ги изнесе своите ставови кои во претходниот период не ги менуваше и така ќе остане до натамошно“, изјави Вучиќ.