Вучиќ со мрачно предупредување: „На почетокот сме на поголема војна“

Српскиот претседател Александар Вучиќ оцени дека светот се наоѓа на почетокот на поголема војна и предупреди дека конфликтите во иднина би можеле дополнително да се прошират.

Во интервју за подкастот „MD MEETS“ на Матијас Депфнер, Вучиќ изјави дека не очекува брзо воспоставување мир и дека актуелната глобална ситуација може да стане уште посложена.

„Не верувам дека мирот ќе дојде наскоро“

„Мислам дека сме на почетокот на поголема војна. Затоа се надевав дека некој досега ќе направи нешто за да воспостави мир. Тоа не се случи, ниту пак ќе се случи наскоро“, рече Вучиќ.

Говорејќи за Украина, тој оцени дека конфликтот најверојатно нема да заврши во текот на оваа година, а можеби ниту до следната пролет.

Вучиќ бара компромис, не пораз на една страна

Според српскиот претседател, во моментов има мал простор за договор затоа што двете страни настојуваат да постигнат победа и пораз на противникот.

„Не ни треба пораз на која било страна, туку компромис“, порача Вучиќ, повикувајќи на прекин на огнот.

Тој додаде дека Русија е нуклеарна сила и дека не верува оти нејзин целосен пораз може лесно да се постигне.

САД и Кина како главни глобални сили

Вучиќ се осврна и на идниот распоред на моќ во светот. Според него, САД и Кина ќе останат главни глобални актери, додека Европската Унија би можела да се позиционира како трет голем столб.

Како други значајни сили ги посочи Русија, Индија, Турција, Пакистан и Саудиска Арабија.

„Го избравме српското столче“

Зборувајќи за надворешната политика на Белград, Вучиќ порача дека Србија не е ничија марионета и дека ќе продолжи да носи одлуки според сопствените интереси.

Тој оцени дека посетата на украинскиот претседател Володимир Зеленски на Србија била корисна за двете земји, а истовремено нагласи дека членството во Европската Унија останува стратешка цел на Србија.

„Сите велеа дека имаме премногу столчиња и дека мора да избереме едно. Да, го избравме. Тоа е српското столче“, изјави Вучиќ.

Тој додаде дека Белград ќе ги одржува традиционалните односи со Русија, но паралелно ќе ги развива партнерствата со Украина и европските држави.