Лула со директна порака пред Трамп во ОН: „Бразилската демократија им припаѓа на Бразилците!“

„Бразилската демократија им припаѓа на Бразилците“

Осврнувајќи се на претстојните октомвриски избори во неговата земја и растечкиот надворешен притисок, Лула јасно стави до знаење дека суверенитетот нема цена. Оваа порака доби посебна тежина бидејќи беше упатена токму пред американскиот претседател Доналд Трамп, кој претходно воведе царини за Бразил бранејќи го својот сојузник, поранешниот претседател Жаир Болсонаро.

„Бразилската демократија им припаѓа на Бразилците. Бразил ќе остане суверена земја и никој нема да нè одврати од тој пат. ОН не успеваат да ја исполнат една од своите најважни мисии – спасување на човештвото од ужасите на војната. Нивниот кредибилитет никогаш не бил на пониско ниво“, истакна Лула.

Критика за војните и трката во вооружување

Лула повика на итна реформа на Советот за безбедност на ОН, предупредувајќи дека глобалните конфликти достигнуваат критична точка. Тој потенцираше дека светот се соочува со најголем број вооружени судири по Втората светска војна, додека истовремено се трошат билиони долари на нова трка во вооружување наместо на развој.

„Попуштањето пред законот на посилниот ги надмина сите граници. Војната не е продолжение на политиката со други средства; таа е нејзин целосен колапс“, подвлече бразилскиот лидер, повикувајќи на обновување на дипломатијата.

Економски пркос наспроти царините

И покрај заострувањето на односите со Вашингтон и високите царински бариери воведени од страна на САД, бразилскиот претседател испрати оптимистички пораки за домашната економија.

Тој истакна дека бразилската економија покажува исклучителна отпорност и најави дека Бразил оваа година очекува историски рекорд во извозот, докажувајќи дека земјата успешно се справува со надворешните економски притисоци.