Голем пожар на грчки ферибот: Евакуирани 29 лица, во пламен стока за снабдување на островите

Успешна евакуација и борба со огнената стихија

Пожарот избувнал во петокот претпладне, додека бродот се наоѓал северно од островот Миконос. Огнот се појавил во еден од гаражните простори, а првичните сомнежи се дека пожарот започнал од едно од товарните возила. На бродот се наоѓале 28 членови на екипажот и еден возач на камион, кои биле спасени без повреди и превентивно пренесени на островот Тинос.

Во сложената спасувачка акција се вклучени бродови на грчката крајбрежна стража, противпожарни пловила и реморкери. Примарниот приоритет на властите е бродот безбедно да биде извлечен за да се спречи негово наклонување или потонување, со оглед на тоа што пожарот е сè уште активен.

Сериозно загрозено снабдувањето на островите

Овој инцидент предизвика сериозен прекин на една од најважните товарни линии. Бродот „Blue Carrier 2“ требало да пристигне на Родос, превезувајќи огромни количини храна, месо, млечни производи, облека, мебел и друга стока наменета за локалните маркети на Кос и Родос.

„Особено загрижува состојбата со ладилните возила во кои имало лесно расипливи производи. Дел од товарот најверојатно е целосно оштетен, а транспортните компании веќе пријавиле значителни финансиски загуби.“

Товарниот брод долг 162 метри е дел од флотата на „Attica Group“ и редовно ги поврзува Пиреја со Сирос, Самос, Кос и Родос. Засега нема официјална најава за заменски брод, а последиците врз снабдувањето на локалното население и бизнисите ќе зависат од тоа колку брзо ќе се воспостави алтернативен поморски транспорт.