Крај на привилегиите во Дедиње: Вучиќ, Брнабиќ и Николиќ ги губат луксузните државни вили

Селидбата зависи од новата влада и безбедносните проценки

Извори од српската влада за медиумите откриваат дека од поранешните функционери ќе се бара да ги напуштат државните објекти веднаш штом новиот претседател и новата влада ќе стапат на должност. Студентската листа која извојува победа на изборите најави реформи, а Вучиќ веќе го призна поразот обвинувајќи ги медиумите и „длабоката држава“.

Сепак, постои можност тие да останат во државните вили уште некое време, доколку безбедносните служби проценат дека нивната безбедност надвор од овие објекти е загрозена. Во тој случај, би биле преместени на друга безбедна локација пред конечно да се вратат во своите приватни домови.

Специјални уредби и продолжени престои во Дедиње

Прашањето за државните вили во Србија со години предизвикува внимание поради менувањето на законските уредби со цел функционерите да го задржат правото на нивно користење. Ана Брнабиќ од 2020 година живее во „Вилата на Јованка“ од 750 квадратни метри. Иако премина на позицијата претседателка на Собранието, Владата ја измени уредбата за таа да може да продолжи да престојува таму.

Сличен е примерот и со поранешниот претседател Томислав Николиќ, кој живее во државна вила од 2012 година. Иако неговиот мандат заврши во 2017 година, Владата ја промени намената на објектот, доделувајќи го на Националниот совет за координација со Русија и Кина, со кој раководи токму тој.

Што се однесува до Александар Вучиќ, тој официјално ја користи „Вилата Бокељка“ која зафаќа 1.700 квадратни метри. Иако медиумите известуваа дека не живее таму постојано, вилата главно служеше за државни состаноци и приеми на странски делегации.

„Тие ќе мора да се иселат во моментот кога новиот претседател и новата влада ќе стапат на должност. Можно е да останат во државните вили уште некое време, но само доколку безбедносните служби проценат дека нивната безбедност е загрозена“, посочува извор од владата.