АЛАРМ ВО СКОПЈЕ: Прогласена епидемија на западнонилска треска, петмина се борат за живот!

Според последните информации, жариштата се лоцирани низ речиси целиот главен град. Епидемија е прогласена во Кисела Вода, Пржино, Аеродром, Бутел и Гази Баба. Засегнати се и Илинден, Драчево, Идризово, Јурумлери и Трубарево. Во моментов се регистрирани 26 случаи на заразата. Од нив, дури 25 пациенти се од Скопје, додека еден е од Велес.

Критична состојба на Клиниката за инфективни болести

Ситуацијата кај дел од заразените е исклучително сериозна. На Клиниката за инфективни болести досега биле примени вкупно 29 пациенти. Од нив, петмина се наоѓаат во тешка здравствена состојба и се приклучени на механичка вентилација за одржување во живот. За жал, вирусот викендов однесе и еден човечки живот, откако почина 83-годишен маж кој имал и други придружни заболувања.

„Најголем дел од заболените се повозрасни мажи над 60-годишна возраст, кои претежно извршувале земјоделски и градинарски активности во приквечерните и раните утрински часови – период кога комарците се најопасни.“

Здравствените власти упатија итен и драматичен апел до сите граѓани. Тие бараат итно преземање на дополнителни заштитни мерки против каснувања од комарци. Се препорачува задолжително поставување заштитни мрежи на прозорците и обилна употреба на репеленти. Граѓаните мора строго да избегнуваат долг престој на отворено за време на зајдисонце и во раните зори. Западнонилската треска може да помине без симптоми кај помладите, но претставува огромен ризик за повозрасните лица со нарушено здравје.