ВМРО-ДПМНЕ обвинува: СДСМ и ДУИ го овозможија влезот на Мацура во „Алта банка“ преку сватот на Ахмети

Мрежа на трансакции: Од акции во Битола до кредити од Белград

Според соопштението на владејачката партија, поранешните функционери на ДУИ, Фатмир Бесими, Бујар Османи и Артан Груби, агресивно го туркале влезот на „Алта банка“ во македонскиот финансиски сектор. ВМРО-ДПМНЕ објави хронологија на настаните според која контроверзниот српски тајкун Давор Мацура, кој моментно е во притвор во Србија, ја презел контролата врз Стопанска банка Битола (подоцна преименувана во Алта банка Македонија) купувајќи ги акциите директно од семејната компанија на сватот на Ахмети.

Берово те очекува

A Airbnb ◎ Instagram

Од партијата посочуваат дека во октомври 2024 година, кичевската компанија „АС Сењак“ на Селаудин Арифи, сват на Али Ахмети, нагло влегла во банкарскиот бизнис купувајќи значаен пакет акции. Потоа, во јуни 2025 година, нивната поврзана фирма зела кредит од пет милиони евра од „Алта банка“ во Белград. Само три месеци подоцна, во септември 2025 година, „АС Сењак“ му ги продава своите акции токму на Мацура, овозможувајќи му директно преземање на банката во Македонија.

Прашања до СДСМ и барање за одговорност

ВМРО-ДПМНЕ јавно прашува дали земениот кредит од 5 милиони евра и купувањето на акциите биле меѓусебно поврзани и дали преку кредитирањето на фирма од кругот на Ахмети, Мацура индиректно го финансирал сопственото влегување на македонскиот пазар.

Владејачката партија го повика лидерот на СДСМ, Венко Филипче, да одговори дали партијата знаела за овие деловни релации на 24 октомври 2023 година, кога тогашниот министер Бесими ја отворил темата за „Алта банка“ на владина седница. Од ВМРО-ДПМНЕ децидно порачуваат дека нема недопирливи и бараат институционална одговорност и целосно расчистување на секоја евентуална незаконитост.

„Случајот Алта Банка е доказ и дека државата и граѓаните на СДС и ДУИ не им биле важни, а единствен интерес им биле бизнис шемите… Нема голем скандал во Македонија, а трагите на парите да не водат директно во Зајас кај ДУИ и Али Ахмети.“ — се наведува во соопштението на ВМРО-ДПМНЕ.