Дипломатска офанзива во ОН: Мицкоски на средба со Каја Калас и лидерите од Западен Балкан

Заеднички приоритети со ЕУ и Западен Балкан

Во фокусот на активностите беше средбата на Мицкоски и лидерите на земјите од Западен Балкан со новата висока претставничка на ЕУ за надворешна политика и безбедност, Каја Калас. На состанокот се разговарало за актуелните регионални предизвици и можностите за зајакнување на меѓусебната соработка.

„Остваривме средба со Каја Калас, на која беа разменети мислења за актуелните регионални предизвици, можностите за понатамошно зајакнување на соработката и заедничките приоритети насочени кон стабилен, безбеден и просперитетен регион“, сподели премиерот на својот Фејсбук профил.

Покрај овој настан, македонскиот премиер зеде учество и на заедничкиот состанок на лидерите на Европската Унија и Западен Балкан, а оствари и билатерални средби со хрватскиот премиер Андреј Пленковиќ и косовскиот премиер Албин Курти.

Посветеност на мирот и силната мултилатерална соработка

Својата агенда Мицкоски ја надополни со учество на панел-дискусијата на високо ниво на тема „Reaffirming the promise of peace: using the power we have“, чиј домаќин беше претседателот на Финска, Александар Стуб. Главни теми на дискусијата биле важноста на дијалогот, одговорното лидерство и улогата на меѓународните институции во справувањето со глобалните предизвици.

На маргините на панелот, Мицкоски оствари и билатерална средба со претседателот Стуб, на која било истакнато значењето на почитувањето на меѓународното право и потребата од градење стабилна и безбедна Европа. Премиерот порача дека Македонија останува доверлив партнер во напорите за мир, како полноправна членка на НАТО и земја цврсто насочена кон европското семејство.