Мистеријата стара 100 години е решена: Еве каде се крие „компасот“ на птиците!

Шпекулациите за мистериозниот компас во телото на птиците траат повеќе од еден век, но германските невробиолози веруваат дека конечно ја решиле загатката.

Тим од Универзитетот „Лудвиг Максимилијан“ во Минхен идентификуваше нервен пат за обработка на магнетни информации кој потекнува од внатрешното уво. Оваа теорија првпат ја поставил францускиот природонаучник Камиј Вигие уште во 1882 година, но била игнорирана и заборавена сè досега.

Како гулабите го наоѓаат патот дома?

Научниците ги проучувале мозоците на гулаби изложени на магнетни полиња и воочиле силна активација во делот од мозокот наречен вестибуларно јадро, кое е поврзано со внатрешното уво. Генетската анализа на ткивото открила клетки со високо чувствителни електрични сензори, слични на оние што ги користат ајкулите за детекција на плен.

Природен ГПС на принцип на „безжично полнење“

„Клетките се идеално опремени за детекција на магнетни полиња со помош на електромагнетна индукција – користејќи го истиот физички принцип што овозможува безжично полнење на телефони“, велат истражувачите. Овој таканаречен „темен компас“ во увото веројатно работи паралелно со другите системи за навигација кои зависат од светлината и видот.