Мицкоски од ОН: Не бараме полесен пат, туку фер правила и исто достоинство како големите сили

Јасна геополитичка ориентација и стратешки сојузи

„Македонските граѓани знаат каде припаѓаат. Ние сме сојузник во НАТО, САД се наш стратешки партнер, а полноправното членство во ЕУ е наша стратешка определба“, истакна Мицкоски, нагласувајќи дека овие политики претставуваат една геополитичка ориентација втемелена врз демократијата и владеењето на правото.

Тој потенцираше дека во време на глобална неизвесност, одговорот на државата не е стратешка двосмисленост, туку јасност, но додаде дека таа сигурност во сојузите не значи вртење грб на остатокот од светот.

Историја на тешки компромиси и жртви

Осврнувајќи се на патот кој го помина државата, премиерот потсети дека поновата историја на македонската нација е обележана со постојани отстапки направени во име на мирот, соработката и повисоките цели на интеграцијата.

„Ако некој сака да види пример за земја што повеќепати се откажувала од нешто што природно ѝ припаѓа како основно право, доволно е да погледне во нашата историја. Донесовме навистина тешки одлуки, често по цена на нашето најосновно чувство за достоинство и правда, продолжувајќи напред дури и кога процесите траеја подолго од една генерација“, рече Мицкоски пред светските лидери.

Интеграција базирана на заслуги, а не на билатерални уцени

Мицкоски испрати јасно предупредување дека довербата во меѓународните институции се нарушува кога граѓаните гледаат дека правилата не важат подеднакво за сите и кога секој направен компромис носи ново барање. Според него, европската интеграција мора да остане процес заснован на мерливи критериуми, а не процес во кој билатералните прашања постојано ја поместуваат целта.

„Не бараме полесен пат, бараме пат уреден со правила. Не бараме пониски стандарди, туку тие да останат стандарди. Ова е прашање на легитимитет и е подеднакво важно за кредибилитетот на самата Европа, чија геополитичка тежина ќе зависи од способноста да ги претвори заложбите во конкретни политички резултати“, заклучи македонскиот премиер од Њујорк.