Тајната на јо-јо ефектот: Масните клетки со години ја „паметат“ дебелината

Што претставува епигенетската меморија?

Организамот по слабеењето реагира со промени во апетитот, хормоните и потрошувачката на енергија. Но, најновите истражувања покажуваат дека проблемот лежи и на клеточно ниво. Истражувачите проучувале масно ткиво кај лица кои значително ослабеле (вклучително и по баријатриска операција) и откриле трајни разлики во активноста на одредени гени во споредба со луѓето кои никогаш немале проблем со дебелината.

Оваа појава научниците ја нарекуваат „епигенетска меморија“. Тоа не значи дека самата ДНК се менува, туку дека се менуваат механизмите кои одредуваат кои гени ќе бидат поактивни. Ваквите промени во масното ткиво можат да опстанат и по губењето на вишокот килограми, што објаснува зошто телото побрзо ја враќа тежината доколку се врати на старите прехранбени навики.

„Враќањето на килограмите по диетата долго време погрешно се претставуваше како едноставно прашање на дисциплина и недостаток на волја. Во реалноста, регулацијата на телесната тежина е многу посложен биолошки процес.“

Здравствените придобивки и долгорочниот пристап

Сепак, експертите предупредуваат дека ова истражување не значи дека повторното дебелеење е неизбежно. Слабеењето и натаму носи огромни здравствени придобивки, како што се подобрување на крвниот притисок, контрола на шеќерот и намалување на маснотиите во крвта.

Овие нови сознанија само потврдуваат зошто современиот пристап кон лекувањето на дебелината се поместува од кратки и екстремни диети кон долгорочна грижа. Одржлива исхрана, редовна физичка активност, квалитетен сон и стручна поддршка се клучните фактори за траен успех, бидејќи организмот не се враќа веднаш во биолошката состојба на лице кое никогаш немало вишок килограми.