Утре е Света Варвара: Денот почнува да расте, а соништата се чуваат во тајност

Православните верници утре ја слават Света Варвара, ден за кој се верува дека го означува почетокот на растењето на денот и смалувањето на ноќите до Божик.

Според народните обичаи, на овој ден се започнува со сеење на божикната пченица и се подготвува варило (житна чорба). Традицијата налагала житото да се остави да врие, а страната на која ќе зоврие го покажувала местото каде треба да се сее за добра жетва.

Покрај земјоделските обичаи, постои и интересно верување поврзано со соништата. Се смета дека од Света Варвара па сè до Божик не треба да се раскажуваат соништата, ниту да се толкуваат. Празникот е посветен на маченичката Варвара, која живеела во времето на царот Максимилијан. Поради нејзината исклучителна убавина, нејзиниот татко Диоскор ја чувал затворена во висока кула, каде таа преку набљудување на природата го спознала Бога и го прифатила христијанството, одбивајќи ги земните бракови.