Од „Куку Леле“ до „Два Бона“: Музичка фешта за сите генерации во центарот на Скопје

Скопје спрема спектакуларен дочек: Каролина, Пајак и „Куку Леле“ ќе грмат на плоштадот за Нова Година

Плоштадот „Македонија“ ќе биде епицентарот на забавата за дочекот на 2026 година, а Град Скопје оваа година се одлучи за проверен рецепт – 100% македонски музички ѕвезди. На најлудата ноќ, скопјани и гостите ќе ги забавува вистинска музичка елита: од поп-дивите Каролина Гочева и Тамара Тодевска, преку легендарните „Куку Леле“ и Миле Кузмановски, па сè до идолите на новата генерација – Пајак, Два Бона и Лара.

„Зимска бајка“ секој ден до 31 декември

Градоначалникот Орце Ѓорѓиевски најави дека празничната магија веќе започна. Во периодот од 15 до 31 декември, центарот на градот ќе живее секој ден од 18 часот со музички настапи и диџеј сетови, додека викендите (од 12 до 14 часот) се резервирани за децата со анимации и работилници. „Скопје конечно ќе покаже дека може да биде весел, модерен и динамичен град, кој наликува на светска метропола во срцето на Балканот“, порача Ѓорѓиевски.