Филипче со поддршка за Радески: Конкретни проекти за решавање на проблемите во Брвеница

Приоритет на водоводната и патната инфраструктура

На промотивниот настан, Филипче истакна дека програмата на Радески опфаќа реални решенија за долгогодишните потреби на граѓаните од овој регион. Како едни од клучните проекти беа посочени обновувањето и проширувањето на водоводната мрежа, со посебен акцент на решавање на проблемот со вода во селото Гургурница.

Дополнително, најавена е изградба на пречистителна станица за отпадни води која ќе ги опслужува населените места Милетино, Челопек, Брвеница и Долно Седларце, како и реконструкција на локалните улици и проширување на мостовите во повеќе села.

Економија, социјална грижа и екологија

Изборната програма предвидува и проекти за локален економски развој, вклучувајќи формирање на агроиндустриска зона за преработка, која треба да овозможи постабилен пласман на земјоделските производи и отворање на нови работни места.

Во делот на општествените дејности и екологијата, планирани се подобри услови во училиштата, изградба на нов Дом на култура во Брвеница, како и Дом за стари лица во Челопек. Воедно, програмата ветува и ефикасно управување со отпадот преку расчистување на дивите депонии и уредување на простори за одмор и рекреација.

„Јовица е чесен и вреден човек, кој секојдневно е меѓу граѓаните. Како актуелен советник, одблиску ги познава проблемите и потребите на граѓаните. Подготвен е со конкретни решенија, за промени на подобро“, порача Филипче, барајќи ја довербата од гласачите.