Аларм од вселената: Сателитите открија дека Европа забрзано останува без вода!

Огромни количини од европските резерви на вода се намалуваат, а на делови од континентот им се закануваат големи суши, открива новата анализа на сателитски податоци.

Научниците од Универзитетскиот колеџ во Лондон (UCL) анализирале податоци од период од 22 години (2002–2024), кои ги следат промените во Земјиното гравитациско поле. Бидејќи водата е тешка, сателитите можат ефикасно да „измерат“ каде се менуваат залихите во подземните води, реките, езерата и глечерите.

Европа поделена: Северот влажен, Југот и Центарот пресушуваат

Наодите откриваат остра нерамнотежа: додека Скандинавија и делови од Британија стануваат повлажни, големи делови од јужна и централна Европа (вклучувајќи ги Шпанија, Италија, Германија, Романија и Украина) забрзано се сушат. Овој тренд претставува сериозна закана за земјоделството и безбедноста на храната, а Англија веќе е предупредена да се подготви за суша која би можела да трае и во 2026 година.