Брисел турка „обратно проширување“, Украина во ЕУ во 2027 и покрај војната

Брисел наводно турка план што би ја внел Украина во ЕУ веќе во 2027, со пет „чекори“ што звучат како политички трилер, а не како класично проширување.

Според наводите опишани од Политико, идејата се врти околу т.н. „обратно проширување“, односно членство прво, а потоа постепено затворање на реформските критериуми. Тоа би било силна геополитичка порака во сенка на војната, но и потег што неизбежно отвора прашања за фер третман на другите кандидати и за кредибилитетот на процесот.

Пет чекори што треба да ја „прескокнат“ најголемата пречка

Првиот чекор е технички: Европската комисија да ѝ помогне на Украина да се движи побрзо низ преговарачките „кластери“, со нови детали што треба да се презентираат на неформален министерски состанок во Кипар на 3 март. Вториот чекор е политички најконтроверзен: создавање „лајт“ форма на членство, со ограничени права или постепено вклучување, за да се избегне директен судир со строгите правила. Токму тука се јавуваат и првите отпори, особено од дел држави што предупредуваат дека „две категории“ членки би биле опасен преседан.

Орбан, Трамп и Член 7, сценарио што ја тестира Европа

Третиот чекор, според ова сценарио, е Виктор Орбан да ја изгуби изборната трка во април, затоа што правилото за едногласност му дава моќ да блокира проширување. Ако тоа не се случи, четвртиот чекор е вмешување на Доналд Трамп, кого европски кругови го гледаат како клучен играч што би можел да го „разубеди“ Орбан, во период кога се споменува цел за договор за крај на војната до јули. А ако и тоа пропадне, последната опција е најтешката: активирање на Член 7 против Унгарија, мерка што може да ѝ ги суспендира правата, вклучувајќи го и ветото за прием на нови членки. Тоа би било историски потег со сериозни последици, па затоа и се третира како краен адут, ако Брисел реши дека повеќе нема простор за компромиси