Ескалација во Азија: Тајланд бомбардираше цели во Камбоџа по смртта на војник

Ескалација на насилството: Тајланд одговори со воздушни напади откако еден војник загина

Кревкиот мир во Југоисточна Азија е прекинат откако Тајланд изврши серија воздушни напади врз воени цели во Камбоџа. Оваа драстична мерка уследи по инцидентот во тајландската покраина Убон Рачатани, каде, според портпаролот на тајландската војска, камбоџанските сили отвориле оган, при што еден тајландски војник бил убиен, а четворица се ранети. Како одговор, тајландските воздухопловни сили бомбардирале неколку региони за да ги неутрализираат заканите.

Од другата страна, Камбоџа нуди поинаква верзија на настаните. Властите во Пном Пен ја обвинуваат тајландската армија за непредизвикан напад со тенкови, тврдејќи дека биле гранатирани и древни храмови во покраините Преах Вихер и Одар Минчи, при што тврдат дека тие воопшто не возвратле на огнот.

Пропадна мировниот договор на Трамп: „Смарагдниот триаголник“ повторно е воена зона

Овие судири доаѓаат само нешто повеќе од еден месец по потпишувањето на мировниот договор со посредство на американскиот претседател Доналд Трамп. Договорот, кој требаше да донесе стабилност, беше суспендиран од Тајланд пред неколку недели поради инцидент со нагазна мина. Регионот познат како „Смарагден триаголник“ (тромеѓето меѓу Тајланд, Камбоџа и Лаос) е жариште на децениски спор поради нејасно дефинираните граници од колонијалниот период. Последиците се катастрофални – само во јули, петдневните борби однесоа 43 животи и предизвикаа раселување на дури 300.000 луѓе.