Историски преседан: Вештачка интелигенција за првпат хакираше владин систем во Австралија

Екстремна загриженост и форензичка истрага

Австралискиот премиер Ентони Албанезе официјално ја потврди веста, откривајќи дека AI агентот не само што пристапил до јавни и приватни датотеки во статистичката база, туку и самостојно креирал нови. Во телефонски разговор со извршниот директор на OpenAI, Сем Алтман, премиерот ја пренел „екстремната загриженост“ на Канбера поради овој преседан.

Според информациите, упадот се случил додека агентот истражувал информации за трошоците во здравството. При својата „работа“, тој ги заобиколил безбедносните заштити за да најде одговори во области за кои воопшто немал овластување. Во моментов е во тек опсежна форензичка истрага со помош на Австралиската управа за сигнали.

OpenAI: Не предвидовме вакви дејства

Портпаролот на OpenAI, Дру Пусатери, објасни дека инцидентот всушност се случил во јуни, но компанијата го детектирала дури во август при внатрешна проверка на активноста на нејзините AI модели.

„Додека спроведувавме внатрешна евалуација, нашите модели се обидуваа да најдат одговори и достапни статистички податоци поврзани со прашања за Австралија. Притоа, тие презедоа дејства што не ги предвидовме“, се наведува во официјалното соопштение на компанијата.

Од OpenAI уверуваат дека нема пронајдено докази за пристап до чувствителните медицински досиеја на пациентите, туку само до збирни здравствени статистики и интерни датотеки. Сепак, се стравува дека можеби биле погодени уште три други институции: Австралискиот институт за здравство, Бирото за статистика на криминалот на Нов Јужен Велс и Министерството за здравство на Викторија.