Косово на поправен испит: Трети парламентарни избори за година и половина!

Граѓаните на Косово денеска повторно излегуваат на предвремени парламентарни избори, што е трето гласање во последните 18 месеци. Овој изборен циклус доаѓа откако ниту една политичка партија во претходните обиди не успеа да обезбеди доволно стабилно мнозинство за да се стави крај на длабоката институционална криза. Земјата е без функционална влада речиси една година, главно поради неможноста на парламентот да избере нов претседател на државата.

Курти повторно фаворит, но коалицискиот потенцијал е клучен

Сите релевантни анализи и анкети предвидуваат нова победа на партијата „Самоопределување“ на актуелниот премиер Албин Курти. Неговата партија победи и на последните избори во декември минатата година, но не успеа да постигне компромис со останатите политички субјекти за клучните функции. Поради целосната блокада и неможноста за договор, косовскиот парламент беше официјално распуштен во април годинава, со што патот кон нови предвремени избори стана неизбежен.

Бројки и факти за денешното гласање

Централната изборна комисија на Косово објави дека изборниот процес опфаќа голем број политички актери кои се борат за довербата на граѓаните. Главните статистички податоци за денешните избори се следните:

Вкупен број регистрирани гласачи- околу 2,1 милиони
Резидентни гласачи на Косово-1,6 милиони
Гласачи од дијаспората-околу 500 илјади
Број на пратенички места-120 седишта
Учесници на изборите-900+ кандидати од 17 партии и 3 коалиции

Организаторите и меѓународните набљудувачи се надеваат дека овој изборен круг конечно ќе донесе постабилна политичка архитектура во Приштина, која ќе овозможи формирање на институции и деблокада на економскиот развој.