Најмалку 13 дронови соборени над Москва, реагираа и аеродромите

Во ноќта меѓу 10 и 11 август Москва беше нападната со беспилотни летала, поради што руските власти воведоа привремени ограничувања на дел од воздушниот сообраќај. Според официјалните информации, уништени биле најмалку 13 дронови.

Градоначалникот на Москва, Сергеј Собјанин, првично соопшти дека руската воздушна одбрана соборила седум беспилотни летала кои се движеле кон главниот град. Подоцна објави дека биле уништени уште шест.

На местата каде што паднале остатоците од дроновите биле испратени екипи на службите за итни случаи.

Ограничувања на два московски аеродрома

Поради нападот, руската Федерална администрација за воздухопловство воведе ограничувања на аеродромите Домодедово и Жуковски.

Во периодот додека мерките биле активни, аеродромите можеле да примаат и испраќаат авиони само со одобрение од надлежните служби. Росавијација подоцна соопшти дека сите ограничувања биле укинати.

Москва и претходно беше цел на дронови

Ова не е прв ваков инцидент во последните недели. Руските власти известија за напад со беспилотни летала и утрото на 28 јули, кога беше соопштено дека десетици дронови се движат во правец на Москва.

По тој напад избувнал и пожар во фабрика во Московскиот регион.