Орбан со ултиматум до Брисел: Членството на Украина во Европската Унија нема да се случи, точка

Унгарскиот премиер Виктор Орбан денеска изјави дека членството на Украина во ЕУ „нема да се случи“.

Според него, „Европската комисија мисли дека клучната одлука што ја одредува судбината на цела Европа може да се донесе без европскиот народ, но греши“, пренесе унгарската агенција МТИ. Орбан рече дека Брисел е решен да ги игнорира резултатите од анкетата „Гласање на Унгарија 2025“.

„Неможе да се прими Украина против волјата на европскиот народ“

Тој додаде дека без разлика на „нивната лукавост“, би било „невозможно да се прими Украина против волјата на европскиот народ“. Оваа изјава ги истакнува длабоките поделби во Европската Унија околу ова прашање.

Критики за санкциите: „Брисел сака да ги жртвува унгарските семејства“

Што се однесува до санкциите на ЕУ кон руските извозници на енергија, тој рече дека Брисел „сака да ја жртвува финансиската состојба на унгарските семејства поради Украина“. Орбан рече дека лидерите на ЕУ не можеле да дадат причина „зошто некој нормален би направил нешто такво“.

Според него, санкциите ќе доведат до тоа семејствата да мора да плаќаат 2,5 пати повеќе за струја и 3,5 пати повеќе за гас. Ова ја принудува владата „целосно да го преиспита системот за поддршка на семејствата“.

За Парадата на гордоста: „Мислев дека тоа прашање е решено“

Орбан изјави дека бил изненаден од минатонеделната Парада на гордоста во Будимпешта. Тој рекол дека мислел оти тоа прашање е решено. Унгарскиот премиер рече дека Парадата на гордоста е „секојдневна закана во Западна Европа“.

Тој додаде и дека луѓето би биле „запрепастени“ да ги видат западноевропските учебници за образование за социјална чувствителност. Орбан рече дека мислел оти Унгарија „се заштитила од тоа“ на референдумот во 2022 година.