Проштално писмо на американската амбасадорка: „Македонија има магија, но работата со корупцијата не е завршена“

По три години исполнети со интензивна дипломатска активност, отворена критика за корупцијата и силна поддршка за евроинтеграциите, американската амбасадорка Ангела Агелер официјално се збогува од Македонија. Во своето емотивно, но и политички прецизно проштално писмо, таа направи рекапитулација на сработеното, не бегајќи од болните теми што го одбележаа нејзиниот мандат – пред сè, борбата против оние што „неказнето краделе со години“. Агелер, која ќе остане запаметена како амбасадорка што не се штедеше да ги посочи аномалиите во судството и политиката, порача дека САД остануваат најголемиот сојузник на македонските граѓани.

„Санкции за оние што ве крадеа“: Јасна порака до корумпираните

Иако тонот на писмото е дипломатски и топол, Агелер не пропушти уште еднаш да ја нагласи клучната битка која ја водеше – борбата за владеење на правото. Таа потсети дека вистинското пријателство значи и помош во отстранување на „канцерот“ на општеството.

„Да се отстранат корупцијата и криминалните организации и да придонесеме за судските реформи кога повратот на инвестициите е оскуден и се санкционираат оние кои краделе од вас со години неказнето“, напиша Агелер, алудирајќи на „црната листа“ на САД која значително се прошири за време на нејзиниот мандат. Таа истакна дека во некои области е постигнат напредок, но во други „останува работата“.

Од Коридорот 8 до Криволак: Опипливите резултати на партнерството

Осврнувајќи се на 2025 година, кога се одбележаа 30 години од билатералните односи, амбасадорката ги наброја стратешките успеси. Таа го истакна модернизирањето на Армијата со софистицирани возила и големите вежби на Криволак како доказ за сериозното партнерство во НАТО.

Посебен акцент стави на инфраструктурата, нарекувајќи ги проектите за Коридорите 8 и 10 како „најголем инфраструктурен проект на земјата досега“, кој ќе донесе регионална безбедност и економски раст.

„Имавме тешки разговори, но вербата во народот ми е огромна“

Агелер призна дека нејзината мисија не била секогаш „розова“. Таа отворено зборуваше за средбите со граѓаните, политичарите и судиите.

„Понекогаш имавме тешки, искрени разговори за прашања што се длабоко важни за двете наши земји, и не секогаш се согласувавме, што е во ред“, вели таа. Сепак, она што ја фасцинирало е „магијата“ на земјата и отпорноста на народот.

„Ја напуштам Северна Македонија со чувство на огромна благодарност. Бидете здрави, бидете храбри, бидете силни и јас ќе навивам за вас на секој чекор“, заклучува Агелер, предавајќи ја штафетата на следниот дипломатски претставник на Вашингтон, но оставајќи силен печат на американското присуство во земјава.