СВЕТОТ ПРЕД ЕНЕРГЕТСКИ ШОК: За неколку дена може да останеме без саудиска нафта

Дронови го затворија нафтоводот кон Црвеното Море

Откако беспилотни летала лансирани од Хутите прецизно уништија важна пумпна станица, властите во Ријад беа принудени да го затворат нафтоводот долг 1.200 километри кој се протега од Персискиот залив до Црвеното Море. Со ова затворање, глобалниот енергетски пазар во моментов губи дури 4% од вкупните светски залихи на нафта, што создава паника кај инвеститорите.

Недостиг на делови и вртоглав раст на цените

Ситуацијата дополнително ја комплицираат проценките на експертите за санација на штетите. Според аналитичарите од „Marhelm“, за целосна поправка на оштетувањата на стратешкиот нафтовод може да биде потребен повеќе од еден месец, а како главна причина се наведува сериозниот „недостиг на резервни делови“.

„Долготрајниот прекин би можел дополнително да ги вивне цените на горивата на светските берзи, откако цената на еден барел сурова нафта од типот ‘брент’ веќе ја достигна загрижувачката граница од 109 долари.“

Овој инцидент е само кулминација на веќе постоечкиот проблем со намаленото производство во регионот. Саудиска Арабија уште минатата недела официјално го извести ОПЕК дека нејзиното производство на сурова нафта забележало драстичен пад на 6,2 милиони барели дневно. Ова претставува огромно намалување во споредба со 10,9 милиони барели кои се произведуваа пред почетокот на војната во Иран.