Трагедија во Гоа: Експлозија на плинска боца уби 25 луѓе во преполн ноќен клуб

Трагедија во туристичкиот рај: 25 загинати во пеколен пожар во ноќен клуб во Гоа

Најмалку 25 лица го загубија животот, а повеќемина се повредени во катастрофален пожар што околу полноќ избувна во популарен ноќен клуб во местото Арпора, во познатата индиска туристичка држава Гоа. Според првичните полициски извештаи, огнената стихија била предизвикана од експлозија на плинска боца во кујната, по што пламенот молскавично се проширил низ целиот објект, оставајќи малку време за евакуација. Поголемиот дел од жртвите се вработени во клубот, но властите со жалење потврдија дека меѓу загинатите има и тројца до четворица туристи, чиј идентитет и националност сè уште се утврдуваат.

Клубот работел без дозвола за противпожарна заштита?

Додека семејствата тагуваат, се отвораат сериозни прашања за безбедносните стандарди. Првичните истраги укажуваат на тоа дека објектот најверојатно не поседувал валиден сертификат за противпожарна заштита. Главниот министер на Гоа, Прамод Савант, најави итна и детална истрага за утврдување на одговорноста. Во меѓувреме, индискиот премиер Нарендра Моди изрази сочувство и вети финансиска отштета од 200.000 рупии (околу 1.889 евра) за семејствата на загинатите и помош за хоспитализираните, кои засега се во стабилна состојба.