Трамп го тресе НАТО: Америка планира да повлече до 40.000 војници од Европа

„Америка на прво место“ ја менува безбедносната архитектура

Овој радикален потег доаѓа како резултат на шестомесечната ревизија на Пентагон, со цел военото распоредување целосно да се усогласи со стратегијата „Америка на прво место“ на претседателот Доналд Трамп. Најголем удар ќе претрпат државите каде што е стационирана најголемата маса војници – пред сè Германија, која моментално е домаќин на околу 36.000 американски војници, Италија со околу 12.000, како и Шпанија со своите клучни воздухопловни и поморски бази.

Фрустрациите на Белата куќа поради одбивањето на европските сојузници да преземат поголем финансиски товар за сопствената одбрана беа јасно видливи уште на јунскиот самит на НАТО во Турција. Тогаш, Трамп отворено изјави дека е „многу разочаран“ од Алијансата.

Нов фокус кон Кина, Иран и картелите

Според актуелната администрација во Вашингтон, американските воени капацитети се далеку попотребни за справување со глобалните закани кои доаѓаат од Кина и Иран, како и за борба против опасните нарко-картели на западната хемисфера.

„Генералот на Военото воздухопловство, Алексус Гринкевич, кој е врховен сојузнички командант на НАТО и шеф на Европската команда на САД, официјално ќе ја достави својата детална анализа до американскиот секретар за одбрана Пит Хегсет. Конечната препорака треба да биде финализирана на 6 ноември.“

Извештајот разгледува опции за намалување на копнените, поморските и воздухопловните сили, како и можно преместување на дел од трупите кон земјите на источното крило на НАТО, најави кои веќе предизвикуваат сериозна загриженост во Европа за иднината на трансатлантската безбедност.