Ако фрижидерот ви е над оваа температура, храната може да пропадне за еден ден

Во летните месеци фрижидерот работи под поголем притисок. Просториите се потопли, вратата почесто се отвора, а секое подолго задржување пред отворен фрижидер внесува топол воздух внатре. Затоа правилната температура е клучна за храната да остане свежа и безбедна.

Најдобро е фрижидерот секогаш да биде подесен на 4°C или пониско. Идеално е да се движи околу 3°C, бидејќи така и потоплите делови, како вратата, остануваат доволно ладни. Ако температурата се доближи или надмине 4°C, храната може побрзо да се расипе.

Дали треба да ја менувате температурата во лето?

Кај повеќето понови фрижидери не мора посебно да ја менувате температурата само затоа што е лето. Но ако забележите дека храната побрзо се расипува, пијалаците не се доволно ладни или фрижидерот работи без пауза, треба да проверите што се случува.

Најсигурно е да користите термометар за фрижидер. Ставете еден на горна, а друг на долна полица и проверете ја температурата по неколку часа. Ако покажува блиску до 4°C или повеќе, засилете го ладењето и повторно проверете по 24 часа.

Внимавајте да не претерате со ладењето

Иако е важно храната да биде ладна, фрижидерот не треба да оди премногу ниско. Околу 1°C дел од храната може да почне да замрзнува, особено зеленчук, овошје, млечни производи и јадења што стојат во задниот дел.

Затоа најпрактичен избор е температура меѓу 2°C и 4°C. Така храната останува безбедна, а сепак не се замрзнува непотребно.

Како да му помогнете на фрижидерот во жештините

Не ја држете вратата отворена додека размислувате што да земете. Не ставајте врела храна директно во фрижидер, туку оставете ја прво малку да се олади. Не ги блокирајте отворите за вентилација и не го преполнувајте фрижидерот до степен воздухот да не може да кружи.

Ако фрижидерот е речиси празен, ставете неколку шишиња вода. Поладните предмети помагаат температурата да остане постабилна. Проверувајте ги и гумите на вратата — ако не дихтуваат добро, студениот воздух бега, а храната побрзо се загрева.

Мал детал што може да ви спаси цела набавка

Редовно чистете ја прашината од задните решетки и не го лепете фрижидерот целосно до ѕид. Ако нема добра циркулација на воздух, уредот ќе работи потешко и ќе лади послабо.

Во лето најважното правило е едноставно: фрижидерот држете го на 4°C или пониско, проверувајте ја реалната температура и не ја оставајте вратата отворена непотребно. Тоа е мала навика што може да спречи расипана храна, непријатен мирис и фрлена набавка.