АЛАРМ НА БАЛТИКОТ: Борбени авиони на НАТО соборија беспилотно летало над Литванија!

Брза реакција на Алијансата и тревога во Полска

Овој сериозен безбедносен инцидент веднаш го потврди и претседателот на Литванија, Гитанас Науседа, кој порача дека ваквата реакција е клучна за безбедноста на целиот регион. Според информациите, леталото дошло од белоруска територија и се движело кон запад пред да биде неутрализирано од силите на Алијансата.

„Беспилотно летало што штотуку навлезе во литванскиот воздушен простор беше уништено од борбени авиони на НАТО. Со оглед на тоа што Русија ја засилува агресијата врз Украина, ваквата подготвеност е од витално значење за нашиот регион“, објави Науседа.

Инцидентот верижно предизвика тревога и во останатите земји од регионот. Полска експресно ги активираше своите воздухопловни сили како превентивна мерка, плашејќи се од прелевање на руските напади со беспилотни летала кои примарно се насочени кон Украина. Сериозноста на ситуацијата ја потврдува и фактот што вчера полската војска извлече сомнително руско беспилотно летало директно од морето кај балтичкиот брег во северна Полска.

Балтичките држави под постојан притисок

Ова не е изолиран случај. Литванија, Латвија и Естонија – сите земји-членки на НАТО кои се наоѓаат на границата со Русија, континуирано се соочуваат со опасни навлегувања на беспилотни летала на нивните територии. Ваквите провокации зачестија откако Москва ја започна воената инвазија против Украина, ставајќи го источното крило на НАТО во состојба на постојана готовност.