Апсолутна трагедија во Франција: 11 лица загинаа во страшна авионска несреќа!

Единаесет лица трагично ги загубија животите при пад на цивилен авион во местото Томблан, во непосредна близина на градот Нанси во Франција. Франсоа Пелилисиер, директор на локалниот аеродром „Гранд Нанси Томблан“ од каде што полетало леталото, ја потврди несреќата и ја опиша како „апсолутна трагедија“. Меѓу настраданите патници имало и лица кои се подготвувале за својот прв тандем скок со падобран, кој го добиле како подарок. Во оваа страшна несреќа животите ги загубија и пилотот на авионот, присутниот медицински персонал, како и искусните инструктори за падобранство кои биле задолжени за летот.

Истрагата се фокусира на првите минути по полетувањето

Поранешниот претседател на Француската канцеларија за истрага и анализа на безбедноста на цивилното воздухопловство (BEA), Жан-Пол Троадек, изјави дека авионот се урнал многу брзо по самото полетување. Токму затоа, фокусот на истражителите е насочен кон тие клучни први минути од летот. Како потенцијални причини за падот се наведуваат можен сериозен технички дефект, вклучително и проблем со моторот, но не се исклучува ниту евентуална нерамнотежа и лош распоред на тежината во самото летало. Троадек потенцираше дека истражителите детално ќе ја проверат целосната документација за одржување на авионот, како и неговата општа техничка состојба пред кобниот лет.

Аматерските видеоснимки од патниците може да ја откријат вистината

За да се расветли оваа тешка воздухопловна несреќа, експертските тимови ќе спроведат опсежна анализа на сите достапни материјали. Ова вклучува преслушување на снимките од контролата на летање, длабинска анализа на податоците од радарот и прегледување на сите снимени параметри од самиот авион. Ќе бидат земени предвид и сите изјави од очевидци на земјата кои го проследиле падот. Посебно значење во истрагата би можеле да имаат приватните видеоснимки што самите патници најверојатно ги правеле со своите телефони за време на летот пред да се случи трагедијата.