Ахмети разочаран од пресудите во Хаг: Борбата на УЧК беше за слобода, а не криминален потфат

Во својата реакција, Ахмети потенцираше дека не смее да се дозволи паѓање во политички замки кои имаат за цел да создадат тензии или да ја оцрнат ослободителната борба на Косово. Тој потсети дека УЧК застанала како директен одговор на угнетувањето и се борела исклучиво за слобода и независност. Според него, историјата на Косово не може да се препишува, а жртвата на еден цел народ не смее да се стави на обвинителна клупа.

Паднаа обвинувањата за трговија со органи

Ахмети посебно го истакна фактот дека Судот ги прогласил обвинетите за невини во однос на злосторствата против човештвото. Дополнително, некогашните тешки тврдења за трговија со органи, кои со години фрлаа дамка врз УЧК, воопшто не се претвориле во обвиненија во овој судски процес. Ова, според лидерот на ДУИ, е јасен доказ дека организацијата не била криминален потфат, туку движење со легитимна цел која на крајот била и постигната.

„Некогашните тврдења за трговија со органи не се претворија во обвиненија. Ова се факти кои треба да се помнат секогаш кога некој се обидува да ја прикаже УЧК како криминален потфат.“

Битката продолжува пред Апелациониот суд

За преостанатите обвиненија кои ги товарат лидерите на ОВК за воени злосторства, Ахмети изрази уверување дека тие ќе паднат во понатамошната постапка. Тој порача дека правната битка продолжува во Апелациониот суд, каде одбраната ќе ги оспори наодите од првата инстанца и ќе бара правда до самиот крај. На пресудата во Хаг, со која Хашим Тачи и Јакуп Красниќи добија по 25 години затвор, бурно реагираше и албанскиот премиер Еди Рама, нарекувајќи ја одлуката „срамна“.