Воден хаос во Тетово – дворовите поплавени по обилните дождови

Силниот и интензивен дожд кој ја зафати Општина Тетово предизвика вистински хаос, зголемувајќи го бројот на повици до пожарникарите од граѓани кои се соочуваат со поплави и потреба од итна интервенција.

Еден од најдраматичните моменти се случи во Желино, каде комби возило останало заглавено во поплавен дел од патот кај подвозникот во правец кон Сиричино. Со неверојатна брзина и координација, четворица пожарникари пристигнале на местото на настанот и успеале со помош на јаже и нивното возило да го извлечат заглавеното комбе од водената стапица. Навистина херојски подвиг на тетовските пожарникари!

Полицијата исто така беше на терен и го пренасочуваше сообраќајот кај булеварот „Благоја Тоска“ на последниот кружен тек кај касарната, каде што повторно, како и многупати досега, коловозните ленти беа поплавени. Во моментов, комуналното претпријатие е на терен и работи на санација.

Командирот на противпожарната единица во Тетово, Авни Амети, изјави дека тимовите моментално се во акција на повеќе локации, вклучувајќи ги Мала и Голема Речица, каде што активно се испумпува вода од куќи, дворови и подруми. Само пред две недели, на 20-ти септември, силниот дожд предизвика слична ситуација, со делумно поплавување на улици и домови.

Тетовските пожарникари уште еднаш покажаа дека се подготвени да се соочат со предизвиците, дури и во најтешките моменти, обезбедувајќи брза и ефикасна помош на граѓаните.