Грчките цариници пресекоа шверц: Запленети 1.296 боци нелегален фреон

Грчките царински служби на Независната управа за јавни приходи – ААДЕ заплениле вкупно 1.296 боци нелегален фреон при контрола на два камиона на граничните премини Дојран и Кипи.

Според информациите, избегнатите царини и даноци во двата случаи се проценуваат на повеќе од 338.000 евра.

Двојна преграда откриена кај Дојран

На граничниот премин Дојран, во раните утрински часови, цариниците провериле товарен контејнер со македонски регистарски таблички кој бил пријавен како празен.

При контролата била откриена специјално изработена двојна преграда, во која биле сокриени 296 боци разладна течност од типот R134a.

Според проценките, избегнатите давачки и даноци за оваа пратка изнесувале околу 55.000 евра.

Уште 1.000 боци откриени кај турската граница

Речиси истовремено, на граничниот премин Кипи кон Турција, цариниците пронашле уште 1.000 боци фреон од типот R404A.

Товарот бил сокриен под редовно пријавена пратка од гипс-картонски плочи во камион со турски регистарски таблички.

Пазарната вредност на нелегалниот товар од Турција се проценува на 884.400 евра, додека избегнатите давачки достигнуваат дополнителни 283.538 евра.

Запленети и возилата

Увозот на овие разладни гасови во Европската Унија е строго ограничен, а контролите се засилени и поради мерките за сузбивање на шверцот и заштита на животната средина.

Од ААДЕ соопштија дека целосно се запленети нелегалниот фреон и возилата, а против одговорните лица се поведени соодветни законски постапки.