Драма над Македонија: Испукал прозорец на Ryanair, патник бил повлечен кон отворот

Вистинска драма се одвивала на лет на Ryanair од Солун кон Минхен, откако над македонскиот воздушен простор испукал прозорец на авионот. Во кабината настанала нагла декомпресија, а маските за кислород веднаш се активирале.

Силен тресок и паника меѓу патниците

Според сведоштвата, патниците најпрво слушнале силен тресок, по што кабината почнала да го губи притисокот. Во авионот настанала паника додека екипажот се обидувал да ја стави ситуацијата под контрола.

Најдраматични моменти преживеал 61-годишен српски државјанин, кој седел веднаш до оштетениот прозорец. Силното струење на воздухот го повлекло кон отворот, но безбедносниот појас и брзата реакција на патниците до него спречиле потешка трагедија.

Пилотот прогласил вонредна состојба

Пилотот веднаш прогласил вонредна состојба и донел одлука авионот да се врати кон аеродромот во Солун. Леталото безбедно слетало, по што биле активирани медицинските и аеродромските служби.

Повредениот патник бил пренесен во болница со повреда на вратот. Лекарска помош добила и бремена патничка, која по извршените прегледи била пуштена дома.

Македонија ќе ја води истрагата

Иако авионот полетал и слетал во Грција, истрагата за инцидентот треба да ја водат македонските надлежни институции, бидејќи оштетувањето на прозорецот се случило во воздушниот простор над Македонија.

Во истрагата се очекува да учествуваат и експерти од Грција, Малта и Соединетите Американски Држави, како и претставници на производителите Boeing и CFM International.

Ќе се утврдува причината за пукањето

Истражителите треба да утврдат што го предизвикало оштетувањето на прозорецот и дали станува збор за технички дефект, оштетување на материјалот или друг фактор. Ќе бидат анализирани леталото, податоците од летот и постапувањето на екипажот.