Дрон удри во луксузен облакодер во Дубаи, евакуиран дел од градот

Драматични сцени се одвиваа во Дубаи откако остатоци од пресретнат дрон удриле во еден од најпознатите облакодери во градот, што предизвика итна евакуација на дел од квартот Дубаи Марина.

Според информациите на властите во Обединетите Арапски Емирати, дронот бил пресретнат од противвоздушната одбрана, а негови делови паднале врз станбениот облакодер „23 Марина“. Станува збор за една од највисоките станбени згради во градот, висока 392,8 метри, со 88 ката и повеќе од 280 станбени единици.

Чад од фасадата на облакодерот

Фотографии и видеа кои се појавија на социјалните мрежи покажуваат густ чад кој се издига од фасадата на зградата, додека службите за итни случаи веднаш пристигнале на местото на инцидентот.

По ударот, властите наредиле евакуација на повеќе згради во околината, како превентивна мерка додека се проверува безбедноста на објектите.

Во исто време, жителите на Дубаи и Абу Даби добиле итни предупредувања на своите мобилни телефони за можни воздушни закани, додека системите за одбрана продолжиле да пресретнуваат летала во воздухот.

Жртва од паднати остатоци

An Iranian drone reportedly struck the 23 Marina tower in Dubai, UAE. pic.twitter.com/jtIJFAwpGI

— Clash Report (@clashreport) March 7, 2026

Според официјалните информации, дел од остатоците од пресретнатиот дрон паднале врз возило во областа Ал Барша, при што загинал возачот.

Со овој инцидент, бројот на жртви во Обединетите Арапски Емирати од почетокот на конфликтот се искачи на четири лица, а сите загинати биле странски државјани.

Властите соопштија дека ситуацијата е ставена под контрола и дека засега нема пријавени повредени лица меѓу жителите на погодениот облакодер.

Тензии во регионот

Инцидентот доаѓа во момент кога тензиите во регионот нагло растат по нападите и одмаздничките акции поврзани со конфликтот меѓу Иран и неговите противници.

Иранскиот претседател Масуд Пезешкијан претходно изјави дека Техеран нема намера да напаѓа соседни држави, освен доколку напад врз Иран не дојде од нивна територија.

И покрај тие изјави, последните настани покажуваат колку брзо регионалните тензии можат да се прелеат и во други делови од Персискиот Залив.